വ്യാകരണം

അർത്ഥങ്ങൾ അറിയും മുമ്പേ
വാക്കുകൾ തന്നെ ഇല്ലാതാവും
അറിയാനായ്  അലയുമ്പോൾ
അലയുന്നതിന്റെ അർത്ഥമറിയും
അർത്ഥം പലപ്പോഴും വ്യർത്ഥമെന്നറിയും
*
ദൈവത്തിന് നാനാർത്ഥങ്ങളില്ല
പര്യായങ്ങളേയുള്ളൂ .
പരമാർത്ഥം തെരയുമ്പോൾ
പുരുഷാർത്ഥമറിയും
അന്വേഷിയും ദൈവവും
ഒരേവാക്കിന്റെ അർത്ഥമാകും
*
അമ്മയുടെ വിപരീതം അച്ഛനെന്ന്
അന്നെത്ര പഠിച്ചിട്ടും അറിയാനായില്ല
വളർന്നച്ചനായപ്പോൾ
എല്ലാ വാക്കിനും വിപരീതമുണ്ടെന്നറിഞ്ഞു
അച്ഛനും അമ്മയ്ക്കും മക്കൾക്കും .

വിപരീതങ്ങളുടെ അർത്ഥമറിയാൻ
ജീവിതം പോരാതെയാവും .